په کندهار کې د دوو ښځینه پولیسو په ګډون شپږ پوليس وژل شوي
لومړۍ پېښه نن سهار د کندهار د لومړۍ ناحيې اړوند د چوک مدد په سیمه کې هغه مهال وشوه چې نامعلومو وسلهوالو په یوه بريد کې دوه ښځينه پوليسې ووژلې.
د کندهار د پوليسو ویاند جمال ناصر بارکزي ازادي راډيو ته د دې پېښې په اړه وویل: "نن سهار شااوخوا اته نیمې بجې د ارغنداب ولسوالۍ دوه تنه پولیسې چې وظیفې ته په لاره وې، د نامعلومو کسانو لهخوا ترور او دواړه په شهادت رسېدلي. دا د بل چا نه، بلکې د طالبانو کار دی."
د ښاغلي ناصر په وینا وسلهوال له بريد وروسته له سيمې تښتېدلي او دوی د دې پېښي په اړه پلټنې پیل کړې دي.
چارواکي وایي، تر دې پېښي ۱۰ دقيقې وروسته نامعلومو وسلهوالو د کندهار ښار د اوومې حوزې اړوند له پنجوايي دوراهي سره د تلاشۍ په پوسته کې یو پولیس ويشتلی او وژلی دی.
دغهراز تېره شپه د کندهار د ارغستان ولسوالۍ په توره ګاره سیمه کې د ملي پولیسو پر پیاده ګزمې د ماین چاودنه سوې چې په نتیجه کې یې درې پولیس وژل شوي او دوه نور ټپیان شوي دي.
تر اوسه د دغه پېښو مسؤليت چا نهدی اخیستی.