ټرمپ وايي هند او پاکستان د کشمیر پر سر کړکېچ خپله هوارولی شي
ولسمشر ټرمپ پر دې موضوع د دوشنبې په ورځ د هند له صدراعظم نرېندرا مودي سره خبرې وکړې، دواړو مشرانو د فرانسې په بیاریڅ کې د نړۍ د اوو سترو صنعتي هېوادونو د سرمشریزې په څنډه کې سره وکتل.
ټرمپ د هند له صدراعظم سره په دې لیدنه کې وویل چې د منځګړیتوب لپاره چمتو دی، خو نرېندرا مودي ورته وویل چې وضعیتیې "تر کنټرول لاندې" دی.
د ولسمشر ټرمپ سره یوځای د خبرو پر مهال مودي وویل د کشمیر مسئله د نوې ډېلي او اسلاماباد ترمنځ یوه دوه اړخیزه مسئله ده.
د هند او پاکستان ترمنځ وروسته له هغې ترینګلتیا زیاته شوه چې نوې ډېلي له هندي کشمیر څخه د کورواکۍ ځانګړی امتیاز واخیست او په دې سیمه کې یې اضافي امنیتي تدابیر خپل کړل.