د تاجکستان صدراعظم: د منځنۍ اسيا امن د افغانستان له وضعيت سره تړلى دى
رسول زاده پرون جمعه په پلازمېنه دوشنبه کې د شانګهاى د همکارۍ سازمان غونډې ته دا خبره وکړه.
هغه وويل هېواد يې تل ټينګار کړى، چې په سيمه کې د امن او ثبات ټينګښت د افغانستان د سولې پروسې په عملي کېدو پورې تړلى دى.
د انټرفاکس خبري اژانس په حواله، د تاجکستان صدراعظم ويلي:
”له بده مرغه په افغانستان کې روان وضعيت لا هم کړکېچن او پېچلى دى او د دې لانجې د حل لپاره نړيوالو هڅو هم د پام وړ نتيجه نه ده ورکړې.“
د شانهګاى د همکارۍ په سازمان کې هندوستان، چين، قزاقستان، روسيه، قرغزستان، پاکستان، تاجکستان او ازبکستان دايمي غړي دي.
افغانستان، ايران، منګوليا او بېلاروس په دغه سازمان کې د څارونکو حيثيت لري.