د خان سټيل د اوسپنې ویلي کولو فابریکې دوهم فاز هم جوړېږي
د خان سټيل فابریکې د لومړي فاز ډبره دوه کاله وړاندې د کابل په صنعتي پارکونو کې اېښودل شوې وه چې تېره یې ورځ د شل میلونو ډالرو په ارزښت د دوهم فاز د جوړېدو ډبره هم کېښودل شوه.
د خان سټيل د فابریکې رئیس وايي،د دغې فابریکې د لومړي فاز له پرانیستې وروسته د تولیداتو په کمیت کې يې زیاتوالی راغلی او زرو تنو ته د کار زمینه هم مساعده شوې ده.
نوموړی وايي،د دغې فابریکې د دوهم فاز په پرانیستلو سره به د تعمیراتي ګول سیخ ترڅنګ ګاډرې هم تولید کړي.
د دوی د معلوماتو له مخې د خان سټيل د اوسپنې ویلې کولو فابریکه په نړیوالو معیارونو برابر هره ورځ ۲۰۰ ټنه ګول سیخ تولیدوي چې ورسره د افغانستان د بازارونو ورځنۍ اړتیاوې پوره کېږي.