امریکا د ملګرو ملتونو د امنیت شورا د بېړنۍ غونډې غوښتنه کړې
په ملګرو ملتونو کې د امریکا ماموریت د جمعې په ورځ په یوه اعلامیه کې وویل، د امنیت شورا بېړنۍ غونډه یې ځکه راغوښتې چې د یو شمېر غړو هېوادونو ځینو وروستیو هڅو پر شمالي کوریا د بندیزونو عملي کېدل له پامه غورځولي او په دې برخه کې یې خنډونه رامنځته کړي دي.
په بیان کې ویل شوي چې پر شمالي کوریا د ملګرو ملتونو د بندیزونو پر عملي کېدو بحث به د امنیت شورا د دې غونډې اجنډا وي.
په بیان کې د کوم مشخص هېواد نوم نه دی اخیستل شوی، خو په ملګرو ملتونو کې د امریکا سفیرې نیکي هېلي د پنجشنبې په ورځ روسیه تورنه کړې وه چې د ملګرو ملتونو خپلواک راپور یې ددې لپاره بدل کړی، څو له بندیزونو څخه د مسکو سرغړاوی پټ کړي.
هیلي او نورو ډیپلوماتانو ادعا کړې چې روسیې پر خپلواکو څارونکو فشار راوړی و چې په راپور کې بدلونونه راولي.