یوناما: د روان کال په لومړیو۳میاشتو کې ۷۶۳ملکیان وژل شوي
یوناما نن په یوې اعلامیه کې د افغانستان د جګړې پر ټولو اړخونو غږ کړی دی چې د ملکي وګړو سر او مال ته جدي پام وکړي.
د افغانستان لپاره د ملګرو ملتونو د استازي مرستیالې اینګریډ هایډن ویلي د روان ۲۰۱۸ کال په لومړیو دریو میاشتو کې د جګړو او تاوتریخوالي له امله ۷۶۳کسان وژل شوي او ۱۴۹۵ژوبل دي.
ملګري ملتونه وايي، دا شمېره د ۲۰۱۷کال د همدې مودې په ترڅ کې د وژل شویو او ټپي شویو ملکیانو له شمېر سره سمون لري.
د یوناما مرستیالې ویلي زیاتره ملکیان په پېچلو ځانوژونکو بریدونو کې وژل شوي دي.
دغه راز هدفي وژنې او هوايي حملې د ملکي وګړو د تلفاتو ستر علتونه دي.