Тошковски: Јасен е ставот на Владата за разрешување на Коцевски
Прашан која е најголемата критика во работата на државниот јавен обвинител Љупчо Коцевски, за кого Владата бара разрешување, Тошковски, одговарајќи на новинарски прашања по јавната дебата за Безбеден град, рече дека „јасен е ставот на Владата во однос на тоа прашање“.
Владата на 11 февруари донесе одлука да поведе постапка за разрешување на Коцевски, а на седница на 18 февруари го разгледа мислењето од Министерство за правда и го задолжи ресорното Министерство да достави предлог за разрешување на републичкиот јавен обвинител пред истекот на неговиот мандат, кој потоа, како што истакна портпаролката на Владата Марија Митева, ќе биде доставен до Советот на јавните обвинители.
„Постапувајќи по заклучокот кој беше донесен на претходната Владина седница со која го задолживме Министерството за правда да преземе активностите во однос на поведување на постапка за разрешување на Јавниот обвинител, Министерство за правда достави мислење во кое се нотирани следниве состојби: како прво нарушениот углед на институцијата со која раководи јавниот обвинител, затоа што чувањето на угледот на институцијата е должност која потекнува од Законот за јавно обвинителство, конкретно член 4 став 1. Понатаму, целокупната јавност во изминатиов период беше сведок на низа скандали, нарушена функционалност на ЈО, незаконски постапувања и корупција, неефикасност и повреда на принципите и самостојноста во вршењето на функциите на обвинителите“, рече Митева.
Таа нагласи дека ваквите состојби се комплетно спротивни на обврските кои произлегуваат од законските надлежности и оти за нив значителен бил придонесот на јавниот обвинител.
Републичкиот обвинител Љупчо Коцевски, одговарајќи на новинарски прашања пред седницата на Советот на ЈО на 18 февруари, изјави дека ќе се произнесе по предлогот за негово разрешување откако Владата ќе го достави до Советот на јавни обвинители.
Во однос на барањето на премиерот Христијан Мицкоски да ја напушти функцијата, Коцевски рече дека ќе одговори откако ќе ги види основите предвидени во Законот за јавно обвинителство. Доколку се утврди дека навистина има тешка дисциплинска повреда, тој рече дека сам ќе се повлече од функцијата.
Коцевски во Собранието беше избран за нов државен јавен обвинител во февруари минатата година. Мандатот на републичкиот обвинител трае шест години.