Во силното невреме што во саботата ја зафати јужната американска држава Тенеси, шест лица загинаа, а повеќе од 20 повредени се префрлени во болници. Во многу градови се оштетени домови и деловни простории.
Три лица, меѓу кои и едно дете, загинаа кога торнадо го погоди округот Монтгомери северно од Нешвил во близина на границата со Кентаки, соопштија локалните власти.
Засега не се познати деталите за другите три загинати лица.
Оперативниот центар за вонредни состојби во Нешвил преку социјалните мрежи објави дека три лица загинале во силното невреме во населба во близина на центарот на градот, а дека 23 други биле примени во болниците во округот Монтгомери со повреди.
Снимката објавена од противпожарната служба во Кларксвил преку социјалните мрежи покажува оштетени домови и остатоци расфрлани низ дворовите, превртена тракторска приколка на автопатот и оштетувања на ѕидовите на зградите.
„Ова се ужасни вести. Градот стои со семејствата кои ги загубија најблиските, ние сме тука да им помогнеме“, рече градоначалникот на Кларксвил, Џо Питс.
Канцеларијата на шерифот на округот Монтгомери соопшти дека торнадото ја погодило областа во саботата околу 14:00 часот. Засолниште за луѓе чии домови се оштетени е отворено во локално училиште.
Градоначалникот Питс рече дека е направена голема штета и ги повика жителите да останат во своите куќи доколку можат, а оние на кои им треба помош да се јават и веднаш ќе им биде испратена.
Националната метеоролошка служба издаде повеќекратни предупредувања за торнадо во Тенеси и соопшти дека планира да ја надгледува областа во Кентаки каде што изгледа дека удрило торнадото.
Повеќе од 80.000 домови останаа без струја во Тенеси во саботата.