Портпаролот на израелската армија за арапски јазик, објави на социјалната мрежа Х мапи на кои се гледа кои делови од Појасот Газа мора да ги напуштат Палестинците, а каде мора да одат, јавува Би-Би-Си.
Користејќи повеќе мапи со објаснувања на арапски, Авичај Адраи им рече на луѓето што живеат на неколку места, вклучувајќи ги Џабалија и Шуџаија, да одат на друго место.
Преку мапите на јужна Газа се повикуваат Палестинците во неколку населени места, вклучително и Бани Сухаила кај Кан Јунис, да одат во засолништата во Рафах на границата со Египет.
Од крајот на привремениот прекин на огнот во петокот, Израел нападна повеќе од 400 цели во Појасот Газа, соопшти израелската војска.
Како што јави Би-Би-Си, во соопштението се вели дека израелските одбранбени сили (ИДФ), воздушните, поморските и копнените сили ја гаѓале Газа, вклучително и области на југот на енклавата.
„Борбени авиони погодија повеќе од 50 цели во обемниот напад на областа Кан Јунис“, се вели во соопштението.
Според соопштението, воздушните напади биле насочени кон џамија во северниот дел на Газа, тврдејќи дека била користена од групата Исламски џихад како оперативен команден центар. Како што наведува Би-Би-Си, овие тврдења не може да бидат независно потврдени.
Откако Израел им нареди на луѓето во северна Газа да се евакуираат на југ, стотици илјади жители на Газа се засолниле во јужниот град Кан Јунис, главно во шатори и засолништа обезбедени од ОН.
