Експлозијата во која загинаа две лица на граничниот премин меѓу САД и Канада не е поврзана со тероризам, изјави гувернерката на државата Њујорк, Кети Хокул.
„Сакам да бидам многу јасен, во овој момент нема индиции дека се работи за терористички напад“, рече гувернерот во изјавата за новинарите.
Две лица, возачот и сопатникот загинале во експлозијата, јавува агенцијата повикувајќи се на неименувани извори.
Инцидентот се случил утрото кога возило експлодирало на мостот што ја поврзува Канада со американската сојузна држава Њујорк.
Канцеларијата на ФБИ во Бафало соопшти дека е на лице место и ги истражува причините за експлозијата. Според прелиминарната истрага, експлозијата не била предизвикана од бомба, пренесува Ројтерс, повикувајќи се на неименувани извори.
Според првичната проценка на граничната служба, како што претходно објави Ројтерс, инцидентот најверојатно го предизвикал невнимателен возач.
„Властите во Канада „активно учествуваат во проценката на ситуацијата“, рече премиерот на Онтарио Даг Форд на мрежата X.
Експлозијата се случи на американската страна на преминот, мостот Виножито, кој ги поврзува двете земји преку реката Нијагара. Уште три моста меѓу Њујорк и Онтарио беа затворени како мерка на претпазливост. Суспендирани се и меѓународните летови на аеродромот Бафало.
Фотографиите и видеата од социјалните мрежи покажуваат густ чад, оган и стражарска куќа која се запалила.
На снимката се гледа дека пожарот бил на страната на американската гранична патрола, недалеку од главниот контролен пункт на возила.
Канадскиот премиер Џастин Трудо и гувернерката на државата Њујорк Кети Хокул се информирани за ситуацијата.
