Хавиер Малеј победи на претседателските избори во Аргентина, покажуваат неофицијалните резултати. Целосните резултати не се објавени, но неговиот ривал, перонистичкиот министер за економија Серхио Маса, во својот говор по гласањето ја призна победата на Малеј.
Актуелниот аргентински претседател Алберто Фернандез изјави дека „верува дека може да почне да работи со Хавиер Малеј за да гарантира уредна транзиција“.
Аргентина се соочува со троцифрена инфлација, претстојна рецесија и зголемена сиромаштија.
Привремените резултати, по преброени речиси 90 отсто од гласачките ливчиња, покажаа дека Малеј има речиси 56 отсто од гласовите наспроти 44 отсто за Маса.
„Демократијата е гласот на народот и таа секогаш мора да се почитува. Им честитам на аргентинските институции за спроведувањето на изборниот процес и на аргентинскиот народ кој учествуваше на денот на изборите на уреден и мирен начин. На новата влада и посакувам среќа и успех“, изјави бразилскиот претседател Луис Инасио Лула Да Силва.
Советникот за национална безбедност на Белата куќа, Џејк Саливан, му честиташе на Малеј за неговата победа, пишувајќи на социјалните мрежи дека со нетрпение очекува да изгради силна врска заснована на човекови права, демократски вредности и транспарентност.
Малеј, самопрогласен анархокапиталист, им вети на гласачите радикален пресврт: сака да ја укине централната банка и националната валута и да ги замени со американскиот долар, да укине бројни министерства и радикално да ги намали распределбите на социјалната политика.
Радикалната програма како што предлага Малеј е особено популарна меѓу младите луѓе кои познаваат само постојани кризи во нивните животи и се разочарани од политичкиот естаблишмент и сакаат нешто сосема ново.