Меџити најавува центар за лицата со цистична фиброза

Министерството за здравство во наредните недели ќе излезе со предлог за тоа како да се реши проблемот што го имаат пациентите со цистична фиброза. Треба да се направи центар во кој ќе се лекуваат, рече на 21 јуни министерот за здравство Фатмир Меџити, одговарајќи на прашање дали и како ќе се реши тоа што лицата со цистична фиброза над 26 години сами си ги плаќаат лекарствата.


Цистичната фиброза е генетска болест која ја имаат околу 130 луѓе во земјава. Тешко ги напаѓа белите дробови и панкреасот, и напредува како што минуваат годините. Затоа пациентите се млади, а нивниот животен век краток



„За тоа кој како ќе прима терапија, сепак секогаш ќе одлучат стручните кадри, комисија, сите кои треба да примат, кои не треба, до која година, ќе одлучат професионалците, додаде Меџити.



Во Собрание минатата седмица не помина предлогот за ослободување од партиципација од медицински услуги и лекови на пациенти со цистична фиброза над 26 години.




Асоцијацијата за цистична фиброза бара решение подолго време за овој проблем.

Пациенти со цистична фиброза, над 26 години, во просек месечно за терапија трошат околу седум илјади денари, а ако има компликации и повеќе.



Моментално, 12 пациенти добиваат „трикафта“, лек со кој се олеснува болеста и лицата со оваа болест може да функционираат без проблеми. Асоцијацијата за цистична фиброза се бори лекот да го добијат сите пациенти во државата. Тие одржаа и неколку протести, а критиките за односот на државата кон овие пациенти кулминираше на средината на февруари кога почина пациент со оваа ретка болест во Македонија, чекајќи државата да обезбеди лек.