Пациентите со цистична фиброза ќе протестираат на трети мај во 12 часот пред Министерството за финансии, доколку не добијат одговор од надлежните институции, до каде е работата со набавката на „трикафта“ за сите на коишто им е неопходна и со законските измени за побрза набавка на лекот. Ова денеска го најави во изјава за медиуми, претседателот на Асоцијацијата за цистична фиброза, Фики Гаспар.
На овој чекор се решиле откако уште пред Велигденските празници испратиле допис до сите институции, за да им одговорат, до каде е работата околу случајот со набавката на лекот „трикафта, но се уште не добиле одговор.
Тој нагласи дека, доколку нема јасни насоки што се случува, тогаш останува работата да се оди на протест во среда на трети мај во 12 часот, пред Министерството за финансии.
Неофицијално, како што додаде Гаспар, наводно вчера на Влада поминало решение за уште 18 пациенти да добијат лек.
„Тоа е за поздравување, но, ние апелираме дека го бараме за сите пациенти. За да нема несигурност и страв кај пациентите. Ако е точно, ќе има страв дали се во таа бројка, кога ќе дојде за нив. Утре мислам дека ќе има состанок во Министерството за здравство, сѐ уште чекаме да биде поканет наш претставник“, подвлече Гаспар.
Пациентите со цистична фиброза подолго време бараат да им биде обезбеден лекот Трикафта кој им е неопходен за болеста. Тие одржаа и неколку протести, а критиките за односот на државата кон овие пациенти кулминираше на средината на февруари кога почина пациент со оваа ретка болест во Македонија, чекајќи државата да обезбеди лек. Во моментов, „трикафта“ примаат 12 лица.
