Косовскиот Телеком остана без интернет поради хакерски напади
Информацијата во изјава за медиумите ја потврди портпаролот на Телекомот, Фадиљ Лепаја, кој информира дека нападите започнале во осум часот наутро.
Хакерски напади врз институциите на Косово
„Косовскиот Телеком денеска се соочува со кибернетички напади, кои започнаа во 8 часот наутро. Нашите тимови ги идентификуваа ИП-адресите кои напаѓаат и интензивно се залагаат за конечно прекинување на нападите“, изјави Лепаја.
Неколку земји од регионот во последно време се соочуваат со пораст на кибер-нападите, поради што Албанија ги прекина дипломатските односи со Иран, затоа што се претпоставува дека таа држава стои зад нападите врз институциите, меѓу кои и против системот на граничните служби.
Во Косово во претходните денови беа нападнати платформата Е-Косова, страницата на Владата, на неколку министерства, на полицијата на Косово и на повеќе онлајн медиуми.
Дел од медиумите во Приштина и денешната ненајавена и ненадејна посета на Албин Курти на Тирана и средбата со албанскиот премиер Еди Рама, ги доведуваат во врска со кибер-нападите врз двете држави.