Неколку илјади приврзаници на затворениот поранешен грузиски претседател Михаил Саакашвили излегоа на протести по извештајот на независната медицинска комисија дека тој бил „мачен“ додека бил во притвор.
Демонстрантите вееја знамиња и држеа транспаренти кои повикуваа на итно ослободување на Саакашвили додека маршираа низ главниот град Тбилиси и се собраа пред зградата на парламентот. Протестот беше закажан да се совпадне со 54-тиот роденден на Саакашвили. Нема извештаи за апсења или насилство.
Саакашвили бил подложен на тортура, тврди група лекари
Непосредно пред протестот, Саакашвили, кој е во притвор од почетокот на октомври објави порака на Фејсбук повикувајќи на национално единство и мирни демонстрации.
„За мене лично, изборот е јасен- или смрт или слобода, бидејќи Грузија ќе умре без слобода и тогаш мојот живот ќе ја изгуби смислата. Во нашата различност и нашата љубов кон слободата е нашата сила и тајната на опстанокот“, напиша тој.
Поранешниот претседател рече дека еден ден Грузија „ќе избере влада која ќе им служи на сите Грузијци, наместо на еден човек“, мислејќи на милијардерот и основач на владејачката партија Грузиски сон, Бидзина Иванишвили. Се верува дека Иванишвили е главниот носител на одлуки во оваа јужнокавкаска земја, иако тој не извршува никаква функција.
