Министерството за економија не крие кој е стратешкиот инвеститор за Попова Шапка. Има неколку понуди и очекуваме самите компании да соопштат дека се заинтересирани да инвестираат во скијачкиот центар, изјави министерот за економија Крешник Бектеши.
Зголемени цени на угостителските услуги, мал интерес за туристички аранжмани
„Има неколку понуди за Попова Шапка. Едната ја обзнани претседателот на Владата Заев и е компанија што доаѓа од ЕУ. Има и домашни компании коишто се заинтересирани. Секако има и компанија која не е дел од ЕУ. Тие веќе доставиле барање до Генералниот секретаријат на Владата имајќи предвид дека таква е процедурата согласно Законот за стратешки инвестиции. Ние очекуваме компаниите сами да обзнанат дека се заинтересирани за да инвестираат во Попова Шапка. До тој момент ќе ги следиме сите процедури и ќе преговараме и ако е во интерес на Полошкиот регион, на Попова Шапка, на граѓаните на нашата држава ќе прифатиме таква понуда“, рече Бектеши во одговор на новинарско прашање на прес-конференцијата по завршната конференција „15 години ја олеснуваме трговијата“ по повод едногодишното претседавање на земјата со ЦЕФТА.
Министерот Бектеши при тоа нагласи дека пред да биде прифатена понудата, согласно Законот за стратешки инвестиции, тој договор би требало да се потврди од страна на Собранието, бидејќи, како што рече, сите договори што произлегуваат како стратешки инвеститор се утврдуваат од страна на пратениците во Парламентот.
