Вечерва во 20 часот ќе биде затворена апликацијата за попишување во земјата, но и апликацијата за самопопишување на дијаспората, информираат од Државниот завод за статистика(ДЗС).
„Долгоочекуваната статистичка операција која во државава се очекуваше речиси 20 години финишира и во тек се последните теренски проверки за попишување на оние домаќинства кои од разни причини не биле опфатени досега“, велат од ДЗС.
Во поголемиот дел од општините низ државата теренските активности се завршени и таму се одвиваат технички активности на раздолжување на попишувачите.
„Во одредени средини, попишувачите се на терен и се уште посетуваат домаќинства за никој на да не биде испуштен. Ова се изолирани случаи во кои попишувачот не успеал да оствари контакт со граѓаните и да ги попише и затоа Државниот завод за статистика апелира до сите граѓани кои се сè уште непопишани, да ги посетат пунктовите во своите општини и да се попишат. Исто така, и во зградата на Државниот завод за статистика, на ул.Даме Груев бр.4, постои пункт каде што можат да се попишат лица од целата територија на град Скопје“, се наведува во соопштението на Заводот за статистика.
Симовски - ДЗС нема побарано продолжување на Пописот
Од ДЗС најавија дека вечерва (четврток, 30 септември), во 21.30 часот, во Клубот на пратениците ќе се одржи прес-конференција по завршувањето на Пописот. На пресот ќе се обратат директорот на Државниот завод за статистика, Апостол Симовски и заменикот-директорот Илми Селами.
Пописот започна на 5 септември. Поради технички причини имаше прекини во првите денови од попишувањето.
