Во моментов активни пожари има во Делчево-пехчевскиот регион и тие се меѓу најголемите на кои треба да им се посвети исклучително внимание во текот на денот, соопшти претпладнево Центарот за управување со кризи (ЦУК).
Активни се пожари во Нов Истевник, Мало Песјак, Балабан и Урачка Маала. Во делот на општина Пехчево пожарот се движи кон селата Робово, Умленик и Чифлик и кон селото Срник.
„Информациите од терен говорат дека во моментот имаме префрлање на пожарното дејствие од селото Разловце кон високите планински сртови на Голак“, велат од ЦУК.
Огнена стихија пустоши низ Македонија
Пожар имаво беровското село Умлена, како и во селата Мачево и Робово. Во Свети Николе вчера беше активен пожар на Богословскиот рид, кој се движеше во правецот на Штип каде интервенирале противпожарните екипи и Армијата, велат од ЦУК. Оттаму додаваат дека во моментов исто така реагира пешадија и ако има потреба ќе бидат испратени хеликоптери.
Пожар има во прилепско во селата Топлица, Ракле и Никодих и Смолане каде се упатени голем број на дополнителни пешадиски сили од Армијата.
Во општина Куманово има активен пожар во село Бељаковце и во моментов е единствениот активен во кумановско, откако вчера останатите биле изгаснати, велат од ЦУК. Се очекува и овој пожар да биде ставен под контрола, велат од институцијата.
Во општините Ранкоце и Крива Паланка има активен пожар во село Гулинци, кој гори веќе два дена, велат од ЦУК додавајќи дека за негово гаснење се испратени 60 војници.
Активен пожар има и во Валандово кој се држи под контрола и се очекува во текот на денот да биде ликвидиран.
Во скопско, каде вчера имаше 18 пожари, комплетно се ликвидирани 17, а останат е пожар во Сарај кој се спуштил од тетовскиот регион.
„Пожарот се спушти од Желини и се движеше кон село Раковиќ и Буковиќ. Во еден момент зафати добар простор од Јасен и во координирана активност со директорот на Јасен во текот на ноќта успеаја со 15-тина луѓе да го локализираат. Во моментов сум известен дека Јасен е изгаснат, но постои опасност повторно да се реактивира“, велат од ЦУК.
Останува активен пожар во охридско, кај Косел и кај село Расино, кој е комплетно локализиран. Пожар кај велешко е локализиран рано утрово, како и три пожари во Кавадарци.
