Премиерот Зоран Заев денеска при посетата на лозовиот насад Тиквеш кај месноста „Бабуна“ во Велес, изјави дека земјоделството не може да се развие дополнително без продажба на државните површини, во одговор на новинарско прашање во врска со продажбата на земјоделско земјиште и најавите од опозицијата од ВМРО-ДПМНЕ дека ќе го блокира законот.
„Лесно е да блокирате важно е да партиципирате и дадете прилог во нешто. Ваквите инвестиции што се прават во земјоделството ниту една банка не ги зема гаранциите што ги даваат самите насади и ги очекуваат од земјиштето“, рече Заев.
Во најава масовна продажба на државно земјоделско земјиште кое ќе може да се пренаменува
Тој нагласи дека не постои инвеститор и не постои никаква можност за дополнителен сериозен развој во земјоделството без сопственост на земјиштето.
„Земјиштето нема никој да го носи ни во Австралија, ниту во Америка, ниту во Европа тоа е тука и тука останува. Прашањето го ставаме како ресурс за развој или не. Затоа ја отворам оваа дебата за сите, ние не брзаме, законот е на ЕНЕР, нека има дебата нека ги кажат сите своите мислења. Ние дефинитивно имаме најголеми аргументи, зашто оваа работа треба да продолжи, ако сакаме да растеме по бруто домашниот производ во делот на земјоделското производство. Ако сакаме да растеме во зголемување на продуктивноста на земјоделското производство, а да инвестираат сите оние кои работат на македонските ниви дополнително во механизација, во рационализација на трошоците и максимилизација на компетитивноста на македонскиот земјоделски производ неопходност е земјоделското земјиште да биде дадено во сопственост на сите инвеститори“, рече Заев.
Инаку, со новиот нацрт закон се предвидува да се продава државно земјоделско земјиште за цена од 0,20 евра до 1 евро по метар квадратен или од 12 до 61 денар. Ќе може да се продадат до 50 илјади хектари слободно земјоделско земјиште. Освен утврдената цена, она што е различно од законското решение донесено во 2013 година е што после 10 години земјоделското земјиште освен за градежни активности ќе може да се даде и под концесија за геолошки истражувања или експлоатација на минерални суровини.
