Министерот за правда, Бојан Маричиќ денеска изјави дека треба да се поздрави фактот што по долго време се случил избор на нови јавни обвинители.
„Нормално е членовите на Советот на јавни обвинители да комуницираат меѓу себе, можно е некој од внатре кој го знаел расположението по определени кандидати, да ги пренел информациите. Но, тоа прашање да го упатите до Советот на јавни обвинители, бидејќи тие се надлежни и тие одлучуваат“, рече денеска Маричиќ на прашање зошто „однапред се знаеле имињата на новите јавни обвинители“ во Обвинителството за гонење на организиран криминал и корупција и во Вишото јавно обвинителство.
Според него, оние што беа избрани се долгогодишни и добри обвинители, и тоа покажува дека во Советот на јавни обвинители внимателно ги разгледувал сите поединечни апликации.
„Не би сакал да коментирам, кој бил избран, а кој не. Тие што не се избрани нормално дека се разочарани, но мислам дека Советот на јавни обвинители е единствено надлежен да цени и да каже според ставот, искуството, профилот на секој од личностите. Впрочем имаше и интервју со секој поединец. Првпат се вршеше изборот по новата законска рамка. односно по новиот Закон за јавни обвинители и затоа тој процес траеше и малку подолго, бидејќи беше потребно и ново нивно оценување“, рече Маричиќ.
Тој порача и дека секој кандидат кој не бил избран овој пат, може да конкурираа повторно.
Избрани јавни обвинители во неколку обвинителства
Советот на јавни обвинители на седницата на 22 април а ги избра Фатиме Фетаи, Бурим Јустеми, Сашо Рајчев, Наум Пановски и Снежана Бундалевска – Георгиевска за обвинители во Вишото јавно обвинителство – Скопје.
Исто така денеска Советот ги избра за обвинители во Основното јавно обвинителство за гонење на организиран криминал и корупција – Скопје Лиле Стефанова, Артан Арјо, Трајче Пеливанов, Наташа Поп Трајкова и Катерина Коларевиќ.
