Министерот за надворешни работи, Бујар Османи смета дека првата меѓувладина конференција и почетокот на преговорите треба да се одржи веднаш и без одлагање и дека Владата работи тоа да се случи уште во јунскиот самит на Европската унија (ЕУ). Сепак, на денешната прес-конференција по повод вчера усвоението Извештај за Македонија во Европарламентот, додаде дека политиките за проширување во ЕУ, се носат со консензус, и ќе мора согласност од сите земји членки.
„Мислам дека клучната порака од вчерашната резолуција е дека Република Северна Македонија испорача и дека сега е време на ЕУ да ја испорача и сите вакви резолуции, заклучоци, информации на европските институции само ја потврдуваат европската перспектива на државата. Очигледно дека имавме јасна недвосмислена поддршка од 26 земји членки за текстот на преговарачката рамка и за почеток на преговорите уште минатата година, но треба согласност од сите 27 земји за да може да се усвои текстот и да се одржи првата конференција“, рече Османи.
Вчера Европарламентот го усвои Извештајот за напредокот на Македонија, но не и амандманот поднесен од група европратеници со кои требаше „да се осуди провокативната реторика на Бугарија спрема Македонија“.
Во однос на наоѓањето решение со Бугарија, Османи изјави дека „не верува дека во овие неколку дена пред изборите во Бугарија, кои треба да се одржат наредната недела, може да се направи суштински напредок“.
Тој нагласи дека во нашиот календар, таргет термин за започнување на преговори е јунскиот самит на ЕУ, а според него, сите земји членки работат на постигнување на овој временски таргет, односно отпочнување преговори во јуни.
