Наводите за наводно руско мешање во американските федерални избори во 2020 година, кои беа објавени од американските разузнавачки служби, не се поддржани со ниту еден факт, објави руската амбасада во Вашингтон.
„Документот подготвен од американската разузнавачка служба е уште еден во низата неосновани обвинувања против нашата земја за мешање во американските внатрешни политички процеси“, се наведува во соопштението пренесено од ТАСС денес.
Во соопштението се наведува дека Вашингтон продолжува со „мегафонска дипломатија“, а главната цел е да се задржи негативната слика за Русија „со цел да се обвинат надворешните сили за дестабилизирачката состојба во земјата“.
"Заклучоците од извештајот дека Русија спроведува операции за да влијае на настаните во САД ја потврдуваат самоуверената ароганција на нивните разузнавачки служби. Не беа презентирани никакви факти или посебни докази", се вели во соопштението на руската амбасада.
Според руските дипломати, новите обвинувања не придонесуваат за нормализирање на билатералните односи и не се во согласност со рускиот предлог за еднаков експертски дијалог со меѓусебно почитување со цел решавање на актуелните прашања.
Заедничкиот извештај на Министерството за правда и домашна безбедност на САД, објавен во вторникот, ја обвинува Русија дека се обидува да влијае на изборите за да помогне во реизборот на Доналд Трамп и да го омаловажи претседателот Џо Бајден. Документот најавува воведување американски санкции против Русија врз основа на заклучоците од извештајот. Русија исто така беше обвинета за мешање во американските претседателски избори во 2016 година, на кои победи Трамп.
