Бедри Ајдари, роднина на еден од осудените во „Монструм", денеска пред Кривичниот суд во Скопје, рече дека се незадоволни од пресудата и повика на протест во петок, бидејќи „тоа им е единствен начин за борба“, и, како што рече „ова е еден вид на војна“.
„Ова не е правна држава и нема правен систем. Најавувам протести и ги повикувам челниците на државата да протестираат како што ние протестиравме за правниот систем да се регулира. Тоа не се случи и барам од политичките партии кои го поддржуваат чинот, да се повлечат и да се дистанцираат од оваа одлука и тие да ни се придржат. Ќе протестираме во петок и ова е еден вид на војна. Тука сме и ќе се бориме, какви ни се средствата, така ќе дејствуваме", изјави Ајдари по изрекувањето на пресудата.
„Монструм“: Доживотен затвор за тројца обвинети, за двајца 9 и 15 години
Денеска Судот им изрече доживотна казна затвор на тројца од обвинетите за петкратното убиство кај Смилковско езеро во 2012 година, двајца добија по 15, односно 9 години, и еден беше ослободен од обвинение. Алил Демири и браќата Агим и Африм Исмаиловиќ, за кои судијата рече дека се виновни за кривичното дело „тероризам“, добија доживотен затвор, обвинетиот Хаки Азири доби казна затвор од 9 години, а Фејзи Азири е осуден на казна затвор од 15 години. Поради недостаток на докази, ослободен е обвинетиот Сами Љута. Пресудата не е правосилна и имаат право на жалба.
Според роднините на обвинетите, се работи за монтиран случај за кој не биле доставени доволно докази за да се открие вистинската причина за мотивот, но и за нарачателот и извршителите на убиството кај Смилковско езеро.
