Во Собранието денеска попладне беше изгласан Законот за решавање на спорот за „ГА-МА“, Законот за инвалидски организации, како и одлуката за огласување на избор на претседател, потпретседател и членови на Државната изборна комисија.
Предлог Законот за изменување и дополнување на Изборниот законик, беше повлечен.
Пратениците во продолжението на 20-тата седница денеска со 60 гласа „за“, 30 „против“ и без „воздржани“ го донесоа Закон за решавање на спорот помеѓу Владата на Република Северна Македонија и Макпетрол АД Скопје по пат на спогодба.
По гласањето, координаторот на ВМРО-ДПМНЕ Никола Мицевски, рече дека законот ги крши членовите 8, 52, 55, 68, 98 и многу други од Уставот и го повика претседателот на Републиката да не го потпише указот за прогласување на овој, како што рече, скандалозен закон.
Пратениците на Левица, Димитар Апасиев и Борислав Крмов, поднеле барање до претседателот на државата, Стево Пендаровски да го употреби своето уставно право на суспензивно вето и да не го потпишува Указот за прогласување на Законот за „Га-Ма“.
Расправата по ова законско решение почна во петокот и траеше повеќе од 21 час за време на викендот.
Собранието на 29-та седница со 85 гласа „за“, без ниту еден глас против и воздржани ја усвои и одлуката за огласување на избор на претседател, потпретседател и членови на Државната изборна комисија.
Цената за државата да си го врати менаџирањето со природниот гас превисока?
Претходно од компанијата „Макпетрол“ преку соопштение рекоа дека нивна обврска е да го почитуваат Законот за енергетика и мора да го продадат својот удел од 50 проценти во „ГА-МА“ бидејќи не може истовремено да вршат и снабдување и пренос на природен гас.
Од „Макпетрол“ велат дека никој ништо не им подарува, туку дека е направена проценка на АД „ГА-МА“ од страна на Бирото за судски вештачења и утврдена е пазарна вредност на акционерското друштво од 65.547.810 евра. Половина од ова или 32.773.905 евра му припаѓа на Макетрол, велат од компанијата.
