Европската агенција за лекови(ЕМА) денеска ја одобри употербата на вакцината на компаниите Фајзер/БиоНТек против коронавирус, отворајќи можност за почеток на вакцинацијата во ЕУ пред крајот на годинава.
„Воодушевена сум што ќе објавам дека научниот одбор на ЕМА денеска се состана и поддржа одобрување на условеното ставање на пазарот на ЕУ на вакцината која ја развија Фајзер и БиоНТек“, рече генералната директорка на Агенцијата Емер Кук на онлајн прес-конференција.
Нова мутација на коронавирусот ги затвора границите
Се препорачува вакцината да им се дава на лица над 16 години.
Двете фармацевтски компании ќе мора да поднесат податоци за следењето на вакцината идната година.
„Ова е навистина историско достигнување. Тоа е значаен чекор напред во нашата борба против пандемијата“, рече Кук.
Одлуката на регулаторното тело треба да биде одобрена и од Европската комисија (ЕК), што веројатно ќе се случи вечерва.
Шефицата на ЕК Урсула фон дер Лајен на Твитер напиша дека одобрувањето од ЕМА е „одлучувачки чекор“ во напорите на Унијата да обезбеди сигурна и ефикасна вакцина за Европејците и дека Комисијата ќе делува брзо.
Шефот на БиоНТек Угур Сахин рече дека се спремни да почнат со испораката на првите дози во ЕУ веднаш штом добијат зелено светло.
Европското регулаторно тело минатата недела дојде под голем притисок од земјите кои бараа одобрување на вакцината што поскоро. Таа веќе е одобрена и почна да се користи во повеќе земји, меѓу кои Велика Британија, САД и Израел.
