Македонската Влада ѝ е благодарна на Германија како претседавач со ЕУ за нејзината улога во разговорите меѓу македонските и бугарските власти. Вчера министерот за надворешни работи Бујар Османи и вицепремиерот за евроинтеграции Никола Димитров во Берлин се сретнаа со бугарската министерка за надворешни работи Екатерина Захариев. Средбата беше на покана на министерот за надворешни работи на Германија Хајко Маас и германскиот државен министер за Европа Михаел Рот.
Од Владата велат дека ангажманот на Германија е значаен сигнал за целиот регион и за кредибилитетот на ЕУ, а честите контакти и средби на високо ниво се во функција на поголемо разбирање со соседна Бугарија.
„Овие комуникации водат кон поголемо разбирање, кон зајакнување на довербата и кон приближување на позициите. Го почитуваме и посветени сме на Договорот од 2017 година кој нуди рамка и инструменти за менаџирање на билатерални прашања. Веруваме дека историските прашања кои се дел од заедничката историја може да се решат низ Комисијата за историски и образовни прашања и веруваме дека решенијата ќе ги јакнат пријателството и соработката меѓу двете земји’, брифираат од Владата.
Од Владата велат дека се убедени оти трите цели: грижата за националниот интерес и правото на самоопределување на македонскиот народ, македонската европска иднина и отворањето на пристапните преговори во декември и добрососедски односи врз основа на взаемно разбирање и почитување, не само што не се спротивни една со друга, туку се целосно компатибилни.
Од таму во име на европските вредности и заедничката ЕУ иднина, го осудуваат говорот на омраза во двете земји и повикуваа да се поддржи ваквиот апел за да се спречи нов наплив на омраза во кој било правец.
Захариева: Се уште не можеме да дадеме зелено светло
Министерката за надворешни работи на Бугарија, Екатерина Захариева, по средбата во Берлин рече дека има напредок во однос на отворените прашања, но и покрај напредокот по петчасовни преговори, не може да ја одобрат рамката за преговори.
