Државната изборна комисија на вечерашната седница донесе Роковник за предвремените избори за градоначалник на Општина Пласница и Општина Штип, кои треба да се одржат на 13 декември 2020 година. Според Роковникот, увидот во Избирачкиот список започнува на 17 октомври и завршува на 5 ноември.
Кандидатурите за градоначалник треба да се достават до 7 ноември. Изборната кампања започнува на 21 ноември, а завршува 10 декември. Ако има втор круг, изборната кампања завршува на 24 декември, а изборниот ден ќе биде на 27 декември.
ДИК го усвои и Упатство за гласање на лицата кои се во домашен карантин поради позитивен тест на ковид-19 или на кои им е одредена мерка самоизолација со решение од Државен санитарен здравствен инспекторат.
Градоначалници на Штип и Пласница ќе се бираат на 13 декември
Доскорешниот прв човек на Штип Благој Бочварски сега е министер за земјоделство, а Исмаил Јохоски, кој беше градоначалник на Пласница, беше избран за пратеник. Должноста градоначалник на Штип сега ја врши Јане Миланов, а на Пласница Елсан Нурчески. Редовните локални избори во Македонија треба да се одржат следната година, наесен.
