Претставничкиот дом на Соединетите Американски Држави, кој е под контрола на Демократската партија, ќе гласа за ограничување на правата на претседателот Доналд Трамп да презема воени акции против Иран откако многу претставници во тоа тело рекоа дека не се задоволни од објаснувањето на Белата куќа за нападот врз иранскиот генерал.
Претседателката на Претставничкиот дом Ненси Пелоси рече дека гласањето за резолуцијата за воената моќ на претседателот ќе биде денеска. Таа додаде дека членовите на Конгресот имаат „сериозни и итни грижи“ за одлуките на администрацијата поврзани со Иран. Со предлог- резолуцијата би се обврзал Трамп да престане да ја користи американската војска во или против Иран освен ако Конгресот не прогласи војна или не одобри користење на сила кон Техеран.
Иранскиот генерал Касем Солејмани беше убиен во американски воздушен напад на 3 јануари во близина на меѓународниот аеродром во Багдад, а иранските сили како одговор на убиството извршија ракетен напад на две бази со американски војници во Ирак.
