Ахмети:Не е најдобро ниту за ДУИ, ниту за СДСМ, да влеземе во предизборна коалиција

Лидерот на ДУИ, Али Ахмети изјави дека владината коалиција со СДСМ функционира во рамките на нормалата. Тој вели дека неговите односи со лидерот на СДСМ Зоран Заев и другите партиски структури се стабилни и добри. За изјавата на пратеникот Мухамет Зеќири, кој рече дека не сака да коалицира со ДУИ, Ахмети вели дека тој не е легитимен претставник на политиките на СДСМ.


Ахмети вели дека во однос на активностите околу изборите уште не преговараат со ниту една партија од македонскиот блок, а за во иднина ќе видат.


„За коалиција со СДСМ не е разговарано. Но, во принцип сум го кажал мојот став, кој го претставува мислењето на партијата, дека не е најдобро ниту за ДУИ, ниту за СДСМ, да влеземе во предизборна коалиција, бидејќи сме во специфични околности, а не во околности кои сме ги поминале порано на локалните избори“, рече Ахмети на инаугурацијата на статуата на американскиот претседател Вудроу Вилсон пред административната зграда на Општина Чаир.


Претходно и премиерот Зоран Заев рече дека односите со ДУИ се стабилни.