Заев лауреат на Меѓународната награда „Иса-бег Исхаковиќ“

Премиерот Зоран Заев е овогодишен добитник на Меѓународната награда „Иса-бег Исхаковиќ“, што ќе му биде врачена на Свечена академија која ќе се одржи на 27 ноември во Народниот театар во Сараево, соопшти Комитетот за доделување на ова единствено државничко признание во Босна и Херцеговина.


„Зоран Заев не само што значително ги унапреди односите во регионот на Западен Балкан, туку покажа и силно политичко лидерство во контекст на порешително приближување на регионот кон Европската Унија и НАТО“, се наведува во образложението на Комитетот за доделување на наградата.


Минатогодишен лауреат на оваа награда е поранешниот шеф на хрватската држава Иво Јосиповиќ, а меѓу добитниците во претходните години се и поранешниот австриски претседател Хајнц Фишер и актуелните претседатели на Словенија, Борут Пахор, на Турција, Реџеп Тајип Ердоган и на Хрватска, Колинда Грабар-Киртаровиќ.