РСЕ дознава: нема отворање на преговори со ЕУ во јуни

Советот на Европската унија во јуни нема да донесе одлука за отворање на пристапните преговори со Северна Македонија и со Албанија, дознава Радио Слободна Европа од доверливи извори во европските институции. Според истите извори одлуката ќе биде донесена во октомври.


Како што се дознава, дипломатските претставници на членките на Европската унија, конечно се согласиле за нацрт-текстот кој би требало да биде усвоен на претстојниот министерски состанок на 18 јуни.


Според нацрт заклучоците во кои РСЕ имаше увид Советот на Европската унија ќе се занимава со ова прашање на првиот состанок по летните одмори, односно во септември.


"Иако се признава постигнатиот напредок и позитивната оценка за напредокот од последниот извештај, во светло на ограниченото време кое е на располагање и важноста на прашањето, Советот ќе се врати на ова прашање со цел заклучување на позитивна одлука што е можно порано, а најкасно до септември 2019 година” се наведува во нацрт-заклучоците кои би требало да бидат усвоени идната недела.


Ако се усвојат во ваков формат, тогаш официјалната одлука за отворањето пристапни преговори со двете земји ќе биде донесена во текот на октомври.За ова прашање е потребен политички печат на шефовите на државите и владите на земјите членки на Европската унија, а нивниот следен состанок ќе биде одржан во октомври.


Европската комисија на крајот на мај препорача безусловно отворање на преговорите со Скопје и Тирана, но земјите членки во овој момент не беа спремни за тоа да одлучат на самитот кој ќе се одржи кон крајот на идната недела.