Могерини повторно побара укинување на косовските царини

Високата претставничка за надворешна политика и безбедност на ЕУ, Федерика Могерини, денеска во Брисел се сретна со членовите на косовската делегација избрана за дијалогот со Србија, соопшти нејзиниот кабинет. Во соопштението се наведува дека за Могерини „присуството на делегацијата во Брисел е доказ за тоа дека косовските власти даваат приоритет на нормализацијата на процесот“. Како што јави дописничката на МИА од Брисел, високата претставничка ја искористила можноста да им повтори на членовите на делегацијата дека под „итно“ треба да се укинат царините за производите од Србија и Босна и Херцеговина, кои Косово ги покачи на сто отсто кон крајот на 2018 година.


"Постигнувањето на комплетен и правно обврзувачки договор за целосна нормализација на односите во контекст на дијалогот помеѓу Белград и Приштина бара клима која придонесува за добрососедски односи, во кои минатите договори се почитуваат и применуваат, а акциите и изјавите кои не се компатибилни со општиот интерес и стратешките цели на регионот се избегнуваат“, посочи Могерини по средбата.


Србија инсистира дека додека не се укинат овие царини дијалогот помеѓу двете страни не може да продолжи. Со овој дијалог посредува Федерика Могерини во име на Европската унија. Последната рунда во ноември во Брисел заврши без никаков напредок.