Изгласани измените на Кривичниот законик

Пратениците попладнево со 63 гласа „за“ и еден воздржан ги изгласаа измените на Кривичниот законик. Гласањето помина без дебата, а пратениците од ВМРО-ДПМНЕ ја напуштија собраниската сала кога таа точка дојде на дневен ред.


Опозиционерите и претходно најавија дека нема да учествуваат во дебатата за измените на Кривичниот законик. Со интервенцијата во членот 275-в, кој се однесува за злоупотреба на постапката за јавен повик, доделување на договор за јавни набавки или јавно-приватно партнерство, се отвора можноста осудениот за Труст, Василије Авировиќ, кој е син на пратеничката Владанка Авировиќ, да добие условна казна, наместо досудената од три години затвор. Измените во овој член може да влијаат и на намалување на казната на бизнисменот Сеад Кочан, кој во јули годинава беше осуден на шест години затвор за случајот.


Од СДСМ попладнево реагираа преку соопштение наведувајќи дека измените во Кривичниот законик се во согласност со Стратегијата за реформи во правосудството и нема да влијаат на застарување на предметите пред судовите. Од таму тврдат и дека овие измени биле усогласени со верзијата што ја предложи и Владата согласно Планот 18 и Стратегијата за реформи во правосудството.


“Исто така, во рамките на политиката на генералното намалување на санкциите, е предложена и измената на висината на казната за кривичното дело од членот 275-в од Кривичниот законик, кој се однесува на злоупотреба на постапката за јавен повик, доделување на договор за јавни набавки или јавно-приватно партнерство. Оваа измена нема да влијае на никаков начин на застарување на кој било предмет отворен од Специјалното јавно обвинителство пред надлежните судови”, тврдат од владејачката партија.