Неизвесно обраќањето на претседателот Иванов пред Парламентот

Неизвесно е дали претседателот Ѓорге Иванов ќе го одржи редовното годишно обраќање во Собранието на Македонија. Терминот не е договорен, а како што информира на средба со новинарите претседателот на Парламентот Талат Џафери, од кабинетот на Иванов досега не е испратено писмо за одредување термин за негово обраќање пред пратениците. Џафери вели дека Иванов нема обврска да се обрати во Парламентот туку дека тоа е негово право. 


Во декември Собранието има планирано три седници, евентуално четири до пет, вклучувајќи и за обраќање на Иванов, доколку побара. Мандатот на Иванов истекува на 2 мај наредната година, а претседателските избори ќе бидат распишани најверојатно на крајот на јануари или почетокот на февруари, информира Џафери.


Во врска со Договорот од Преспа, за кој законот за ратификација нема потпис од претседателот на државата, и не е доставен во Службениот весник, Џафери рече дека ќе биде испратен без потпис на Иванов, но не прецизираше кога.