Ирачкиот претседател вети подобри односи со Иран

Ирачкиот претседател Барам Салих вети дека ќе ги подобри билатералните односи со Иран во време кога Техеран е загрижен поради економското влијание од обновените американски санкции. Тој ова го изјави денеска во Техеран, по разговорите со неговиот ирански колега Хасан Рохани, кој нагласи дека меѓусебната трговска размена годинава може да достигне 20 милијарди долари, наспроти 7 милијарди колку што беше минатата година.


Иран има големо влијание во Ирак по американската инвазија од 2003 година во која беше соборен поранешниот ирачки лидер Садам Хусеин. Техеран се надева дека ќе продолжи со извозот во соседната земја и покрај американските санкции.


Рохани рече дека со Салих разговарале за зголемувањето на трговијата на струја и нафтени производи, како и за воведување зони на слободна трговија во граничната зона. Тој рече дека исто така разговарале за заеднички проекти во нафтената индустрија и за подобрување на транспортните врски меѓу двете земји.


Ирак е втор најголем пазар за иранските производи, после Кина. Ирак од Иран увезува речиси сè – од храна и машини, до струја и природен гас.


Претседателот Доналд Трамп ги повлече САД од нуклеарниот договор меѓу Иран и шесте светски сили потпишан во 2015 година и најави нови санкции против Техеран. Оттогаш се намали иранскиот извоз на нафта, а иранската валута изгуби повеќе од половина од својата вредност.