Каменос: Остануваме во владата додека договорот од Преспа не стигне во парламентот

Позицијата дека кога договорот од Преспа ќе дојде во грчкиот парламент, Независни Грци ќе ја напуштат Владата, уште еднаш ја повтори коалицискиот партнер и министер за одбрана на Грција Панос Каменос, говорејќи во Солун пред членовите на Национален совет на неговата партија, во отчетот за четиригодишното учество во Владата.


"Нашата соработка со Владата, нашиот престој во Владата ќе биде се додека не дојде „нож до коска“, односно додека да дојде договорот во грчкиот Парламент, каде што чесно и јасно, како што имаме изјавено, ние ќе си заминеме", рече Каменос.


Тој уште еднаш го изрази неговото несогласување и несогласувањето на Независни Грци, дека не прифаќаат сложено име со вклучен термин Македонија. Како што јави дописничката на МИА од Атина, лидерот на Независни Грци, сепак објасни дека Владата нема да падне, истакна дека се уште важи она за кое што се согласиле со грчкиот премиер, односно дека за договорот од Преспа одново да разговараат во март следната година.