Собранието усвои нов начин за покривање на патните трошоци на пратениците

Собраниската Комисија за прашања на избори и именувања усвои нов начин на покривање на трошоците на пратениците, со што од 1 септември пратениците од внатрешноста на државата кои не поседуваат живеалиште во Скопје, ќе мора да одберат дали ќе патуваат секој ден на работа со свој автомобил, за што ќе добиваат надомест за патарина и за гориво во висина од 20 отсто или ќе закупат стан за кој Собранието ќе издвои средства од најмногу 400 евра, а трошоците за гориво ќе им бидат покриени само за викенди.


Според пресметките на Собранието и тврдењата на пратениците, со ова драстично ќе се намалат средствата за патни трошоци за пратениците, кои досега чинеа илјадници евра.


„Направени се сериозни консултации со секторот за финансии во Собранието, со сите пратенички групи, искористени се и компаративни искуства“, изјави претседателот на Комисијата за прашања на изборите и именувањата Илија Димовски.


Во Одлуката за висината на надоместокот на пратениците за користење автомобил во лична сопственост за службени цели и надоместок на трошоци за патарина се предвидува намалување на надоместокот за гориво од 30 на 20 отсто, а освен фискална сметка како доказ тие сега треба до собраниските служби да доставуваат и печатена потврда односно белешка за корисник на платежна картичка издадена заедно со фискалната сметка за платена патарина заедно со слип потпишан од пратеникот или друг соодветен доказ за електронска наплата, беше наведено на седнициата.