Граѓаните да ги проверат своите податоци во Избирачкиот список за време на јавниот увид за есенскиот референдум што трае до 23 август, повика Државната изборна комисија (ДИК) по забелешките во јавноста дека во Избирачкиот список сè уште има фантоми, починати лица и други неправилности. Од ДИК нагласуваат дека промените во Избирачкиот список граѓаните може да ги направат само со поднесување соодветна документација.
Единствен начин за да се решат проблемите е постојано ажурирање на Избирачкиот список.
Како што државните органи имаат обврска, така и граѓаните имаат обврска да ги пријават промените, вели претседателот на ДИК, Оливер Дерковски.
Во однос на некои случаи со повеќе лица на иста адреса, од Комисијата велат дека има постапки што најверојатно сè уште е во тек во МВР и дека потоа треба да донесе решение за да може тие лица да бидат отстранети од Избирачкиот список.
Членот на ДИК Јанакие Витановски на седница на Комисијата појасни дека доколку во Избирачкиот список има починати лица, членовите на нивното семејство треба да се упатат во подрачните канцеларии на ДИК и со умреница да докажат дека тоа лице е починато за да се тргне од Избирачкиот список. Исто така, укажа има многу граѓани кои не ги смениле своите адреси при промена на живеалиштето, но посочи и на други промени.
До вчера напладне 158 иселеници се пријавиле за изјаснување на референдумот за името во ДКП. Најмногу од нив по 14 се пријавиле во ДКП во Виена, Лондон, Торонто и Љубљана, додека во Берн, Швајцарија се пријавиле 12 државјани на Република Македонија кои живеат во странство.
Доколку некој од иселениците се пријави за изјаснување во дипломатско конзуларно претставништво во странство тогаш нема да може да гласа во Македонија доколку допатува во земјата, укажуваат од ДИК.
