Државниот секретар на Соединетите Американски Држави Мајк Помпеo за време на својот престој на Блискиот исток ќе бара од меѓународната заедница воспоставување на нови санкции за оние кои помогаат за иранската ракетна програма, вели висок функционер. Брајан Хук, виш политички советник кој патува со Помпео, вели дека ќе бараат од државите ширум светот да воспостават санкции против поединци и ентитети кои се поврзани со иранската ракетна програма. Помпео, кој на позицијата државен секретар дојде оваа недела, пристигна во Ријад како дел од посетата на Блискиот исток во чии рамки ќе ги посети и Ерусалим и Аман. Тој таму пристигна откако во Брисел учествуваше на самитот на министрите за надворешни работи на земјите членки на НАТО.
