Манчевски сведочеше дека му бил скршен носот на 27 април

Во Кривичниот суд денеска сведочи и министерот за информатичко општество и јавна администрација Дамјан Манчевски за нападот врз пратеникот и лидер на Алијансата за Албанците Зијадин Села во Парламентот на 27 април, минатата година. Манчевски рече пред судот дека се здобил со удар по главата при што му бил скршен носот.


„Маваа по нас, некои со раце, некои со сталаци за камери, со столици, со компјутери. Тоа траеше два и пол часа. Села беше на крајната лева страна од групата пратеници кои бевме во ќошот од прес-центарот“, кажа Манчевски.


Тој посочи дека слушнале извици за закани, дел упатени конкретно за лица по име, а дел генерално за сите. Се слушало „убиј го Села, убиј го Заев, убиј ги предавниците“, истакна Манчевски во своето сведочење пред судот.