Алаѓозовски: Граѓаните ако имаат сознанија за каква било неправилност да не известат
Најбурни се реакциите поради доделени средства на шефот на кабинетот на државниот секретар Валмир Азири, но Алаѓозовски на прес-конференција рече дека не може да одговара за поединечни проекти и дека за сите нив важи ставот дека се отворени да примаат известувања за какви било неправилности.
„Максимално сме отворени и презедовме храбар чекор затоа што ги објавивме и имињата на добитниците, и доделените и побараните средства. Не прикриваме ништо, ниту одбегнуваме одговорност. Расположени сме и упатуваме повик до сите граѓани и вработени во институциите и надвор од нив, доколку имаат сознанија за каква било неправилности да не известат. Ние ќе постапиме согласно процедурите и законите“, рече Алаѓозовски на прес-конференција попладнево во Владата на која соопшти дека на тековната седница е усвоена Националната стратегија за развој на културата 2018-2022.
Додаде дека се подготвени да преземат и соодветни чекори на одговорност и дека побарале мислење од Антикорупциската комисија, а се отворени и за Јавното обвинителство и за други надлежни институции, ако тоа го побараат од нив.
„Комисиите ќе ги преиспитаат сите проекти за кои ќе се утврди неправилност од аспект на замерките кои беа изнесени во јавноста. Некои носители на проекти веќе повлекоа дел од проектите. Остануваме отворени и максимално сме расположени сите неправилности да ги коригираме“, рече министерот за култура.