Турските власти во југоисточниот округ Дијарбакир денеска воведоа полициски час поради спроведување на масовна антитерористичка операција, соопштија локалните власти. Забрана за излегување на улиците стапи на сила во 8 часот по локално време во 71 село и 105 ненаселени територии.
Во соопштението се наведува дека во тие области е можно да се наоѓаат високи членови на сепаратистичката организација Курдска работничка партија (ПКК). Во округот се спроведе акција за уништување на засолништа, магацини и други објекти, а ќе се одзема оружје и средства за комуникација на ПКК.
Засега не е одредено колку ќе трае полицискиот час, а антитерористичката операција се спроведува паралелно со офанзивата на турската Армија во северна Сирија наречена „Маслиново гранче“ против Силите за заштита на народот на сириските Курди.