2-ноябрда казакстандык "1612 Info" Телеграм каналы активист, жөө күлүк Марат Жылынбаевдин сотунан кыска видео жарыялады. Сүрөттөрдө ал “нааразылык иретинде оозун тигип алганы” жазылган кагазды кармап турат.
“Азаттыктын” казак кызматы Астана шаарынын тиешелүү департаментине кайрылганда, бул маалымат тастыкталды. Департамент өкүлдөрү активист тамактан баш тартканын, “профилактикалык баарлашуудан” кийин оозундагы жиптерди алганын кошумчалашты.
Каттоодон өтө албай жаткан оппозициялык «Алга, Казакстан!» партиясынын лидери Жылынбаевге каршы сот жараяны 30-октябрда башталган.
"Аты аталбаган" күбөлөрдүн өтүнүчү менен ал жабык режимде өтүүдө. Айыпталуучу, тарапташтары жана авдокат буга каршы чыгышкан.
Быйыл май айында марафонго адистешкен 60 жаштагы атлет административдик иш боюнча камакка алынган. Кийин ага карата «тыюу салынган уюмдун ишмердигине катышуу», «экстремисттик уюмду каржылоо» беренелери менен кылмыш иш козголгон.
Жылынбаев казак бийлигин сындап, тынч акцияларга катышып жүргөнү менен белгилүү. Ал тагылып аткан күнөөнүн бардыгын четке кагууда. Активист жана санаалаштары иштин артында саясий жүйө турат деп эсептешет.
