Жарандык авиация мамлекеттик агенттиги Тажикстандын “Сомон Эйр” авиакомпаниясына Кыргызстандын аба мейкиндигин пайдаланууга уруксат берди. Бул тууралуу мекеменин сайтында кабарланды.
Мунун алдында “Сомон Эйр” Кыргызстандын тиешелүү мекемесине кайрылып, Дүйшөмбү – Үрүмчү – Дүйшөмбү жана Дүйшөмбү – Новосибирск – Дүйшөмбү авиакаттамдары үчүн аба мейкиндигин пайдаланууну суранган. Жарандык авиация кызматы тажик тарапка уруксат берүү маселеси каралып жатканын маалымдаган.
Тажикстандын учактары Кыргызстан аркылуу Орусияга 5-февралдан, Кытайга 8-февралдан тартып уча баштайт. Каттамдар Boeing 737-800 жана Boeing 737-900 учактары менен аткарылат.
2021-жылдын апрель-май айындагы кыргыз-тажик чек арасындагы куралдуу жаңжалдан кийин Кыргызстан Тажикстан менен чек арасын бир тараптуу жапкан. Бул чечим чек ара тилкелери толук такталганга чейин күчүндө болору айтылган.
Министрлер кабинетинин 2021-жылдын 21-майдагы токтомуна ылайык, Тажикстандын жарандарынын Кыргызстандын аймагына киришине, өлкөдө болушуна, ары-бери жүрүшүнө жана Кыргызстандын аймагынан транзит аркылуу өтүүсүнө "убактылуу чектөө" киргизилген. Ошол эле жылдын 25-майга караган түнү Дүйшөмбүдөн Бишкекке Тажикстандын "Сомон Эйр" авиакомпаниясы менен учуп келген 200дөй тажикстандыктык Кыргызстанга киргизилбей, артка кайтарылган. (ErN)
