Президент Садыр Жапаров 10-июлда Бишкек шаардык кеңешинин депутаттарын кайра шайлоодо шайлоо тилкесинен тышкары добуш берди.
Президенттин басма сөз кызматы бир күн мурда президенттин жеке коопсуздук кызматкерлеринин биринен коронавирус чыккандыктан участкалык шайлоо комиссиясы көчмө добуш берүүнү уюштурганын кабарлады.
“Президент тапшырган ПЧР тестинин жыйынтыгында коронавирус инфекциясы чыккан жок”, - деп айтылат маалыматта.
Мыйзам боюнча участкалык шайлоо комиссиялары шайлоочулардын тизмесине киргизилип бирок ден соолугуна байланыштуу же мыйзамда көрсөтүлгөн башка себептерден улам добушканага келе албаган шайлоочуларга добуш берүүгө бир күн калганда шайлоо тилкесинен тышкары жайда добуш берүү мүмкүнчүлүгүн түзүп берет.
11-апрелде Кыргызстандагы 28 шаардык, 420 айылдык кеңешке шайлоо өткөн.
Добуш сатып алуу жана административдик ресурс колдонуу фактылары аныкталып, май айында Бишкек, Ош жана Токмок шаардык кеңештерине өткөн шайлоонун жыйынтыктары жокко чыгарылган. Үч шаарда кайра шайлоо 11-июлга белгиленген. (BTo)
