Кыргызстанда коронавирустан абалы оорлоп кеткендердин саны көбөйүүдө. COVID-19га каршы республикалык ыкчам штабдын 1-апрелдеги маалыматына караганда, бүгүнкү күндө ооруканада жаткандардын 4,7% абалы өтө оор деп мүнөздөлүп жатат. Үч күн мурда бул көрсөткүч 3,5% болчу.
Азыр ооруканаларда 504 бейтап жатат, алардын экөөнүн гана абалы канааттандырарлык.
Калгандарынын абалын дарыгерлер орточо оордукта, оор жана өтө оор деп үч түрдүү баалап жатышат.
100 бейтаптын абалы оор, алар COVID-19 менен ооруканада жаткандардын 19,8% түзүүдө.
Өтө оор абалдагылар 24 адам.
Мындан тышкары 378 бейтаптын абалын дарыгерлер орточо оордукта деп мүнөздөп жатышат. Алар ооруканада жаткандардын 75%.
Коронавирус жуккан кыргызстандыктардын жалпы саны 88 миңге жетти, алардын 1,5 миңи каза болду. (RK)
