Беларус оппозициясынын лидери Светлана Тихановская президент Александр Лукашенконун бийлиги элдин үнүн укпагандыктан, өлкө өтө терең саясий кризиске кабылганын билдирди.
Ал 5-сентябрдагы түз эфирдеги сөзүндө «Беларус эли өзгөрдү, ойгонду» деп айтты. Тихановскаянын билдирүүсүндө, 9-августта өткөн президенттик шайлоонун талаштуу жыйынтыгына каршы акциялар уланат.
«Беларустар өзгөрүүлөрдү каалайт. Азыркы бийликке мындан ары ишенбейт. Көчөгө чыккан элди артка кайтаруу мүмкүн эмес», - деди ал.
9-августтагы шайлоодо учурдагы президент Александр Лукашенко негизги атаандашы Светлана Тихановскаяны жеңип, добуштардын 80% жакынын алганы расмий жарыяланган. Шайлоодон бери өтүп келе жаткан нааразылык акциянын катышуучулары иш жүзүндө оппозиялык талапкер утканын билдирип жатышат.
5-сентябрда студенттер жана аялдар маршы өтүп, анын катышуучулары шайлоонун жыйынтыгына жана полициянын үстөмдүгүнө каршылык билдиришти.
Батыш мамлекеттери Лукашенко бийликте турган кезде өткөн шайлоолордун бирин да тааныган эмес.
