Грузиянын мурдагы өкмөт башчысы жана мурдагы ички иштер министри Вано Мерабишвили дээрлик 7 жыл түрмөдө отуруп, 20-февралда бошотулду.
Полиция күчтөрүнүн реформасынын башында турган Мерабишвили «Көз боёмочулук» жана «Кызматынан кыянаттык менен пайдалануу» беренелери боюнча соттолгон. Экс-министр эркиндикке чыкканда кийин саясатка кайтарын, Бидзина Иванишвилинин «Грузин кыялы» партиясы башкарган өкмөттү кетирүүгө аракеттенерин билдирди.
Саясатчынын жылдызы 2003-жылкы «роза ыңкылабынан» кийин жанган. 2004-2012-жылдары президент Михаил Саакашвлинин тушунда Ички иштер министрлигин жетектеген, кийин премьер-министр болгон. 2013-жылдын май айында бийлик «Грузин кыялы» партиясына өткөндөн кийин камакка алынган. Партиянын лидерлери Саакашвилинин бийлигин «кандуу режим» деп аташууда.