"Эркин Европа/Азаттык" радиосунун (RFE/RL) президенти Жейми Флай Тажикстандын президенти Эмомали Рахмон менен Швейцариянын Цюрих шаарында жолугуп, анда “Азаттыктын” тажик кызматынын ("Озоди" радиосу) журналисттеринин аккредитация алуу маселесин көтөрдү. Флай эл аралык радио журналистиканын эң жогорку стандарттарын карманаарын, өкмөттүн коркутууларынан улам ал стандарттарга шек келтирбей турганын белгиледи.
Ошондой эле эгер “Азаттыктын” тажик кызматынын журналисттеринин аккредитация маселеси тез арада чечилбесе, радио Тажикстандагы ишмердигинин кайра карап чыгууга туура келерин белгиледи.
"Эркин Европа/Азаттык" радиосу өз журналисттеринин тандалма аккредитациядан өткөрүлүшүнө же кыска гана убакытка уруксат берилишине макул эмес", - деди эл аралык радионун президенти.
Бул жолугушууда тажик президенти Рахмон “Озоди” радиосунун ишинин маанилүү экенин белгилеп, радионун Тажикстанда иш алып баруусун каалай турганын айтты. Мындан улам "Эркин Европа/Азаттык" радиосунун президенти Жейми Флай Тажикстандын Тышкы иштер министрлигин журналисттерге каршы опузаны токтотууга чакырды.
31-октябрда Тажикстандын бийлиги “Азаттыктын” тажик кызматынын баш-аягы 20 журналисттин жана кызматкерлеринин аккредитация алуу тууралуу өтүнүчүн жарым жартылай гана канааттандырып койгон. Ага ылайык, алты кабарчыга алты айга, бирөөнө үч айга гана аккредитация берилген. Ал эми 11 кабарчыга аккредитация берилген эмес.
Тажик мыйзамдарына ылайык, эл аралык медиа каражатына иштеген журналисттер жыл сайын өлкөнүн Тышкы иштер министрлигинен иштөөгө уруксат алып турушу керек.
Тажик бийлиги аккредитация берүү эрежесин көз каранды эмес маалымат каражаттарынын ишмердигин чектөө үчүн колдонгону буга чейин да байкалган. 2016-жылы «Озоди» радиосу президент Рахмондун кыздарынын бири жаңы кызматка дайындалганы тууралуу жазып чыккан соң алты журналистинин аккредитациясы жокко чыгарылган.
