“Апрель” телеканалынын жетекчиси Дмитрий Ложников прокуратурага сурак берип чыкты.
Анын айтымында, атайын прокуратурага бир саатка жакын сурак берген. Ал маалыматты тышка чыгарбоо боюнча тилкат бергенине байланыштуу кайсы иш боюнча суракка чакырылганын айта албасын билдирди.
Мурдагы президент Алмазбек Атамбаевге таандык экени айтылган “Апрель” каналынын жетекчиси Ложников буга чейин 7-8-августтагы окуялар боюнча ИИМге сурак берген.
Бүгүн, 23-августта Кой-Таштагы окуя боюнча жарандык активист, Кыргызстан Социал-демократтар партиясынын саясий кеңешинин мүчөсү Адил Турдукулов да сурак берип чыкты. Турдукулов “Азаттыкка” кабарлагандай, 7-8-августтагы окуялар боюнча күбө катары тергөөчүлөрдүн суроосуна жооп берген.
Ички иштер министрлиги Кой-Таштагы окуяларга байланыштуу саясий эксперт, өкмөт алдындагы Стратегиялык изилдөөлөр институтунун мурдагы директору Валентин Богатырев да суралганын кабарлады.
7-8-августта Кой-Таш айылындагы үйүндө мурдагы президент Алмазбек Атамбаевди кармоо операциясы жүргөн. Анда УКМКнын бир кызматкери каза болуп, 100гө жакын адам ооруканага кайрылган.
Бул окуялар боюнча мурдагы президент Алмазбек Атамбаев президенттик аппараттын мурдагы башчысы Фарид Ниязов, КСДПнын мүчөлөрү Алга Кылычов, Кыяз Исмаилов жана Амантур Жамгырчиев 8-октябрга чейин камакка алынган. Жогорку Кеңештин депутаты Ирина Карамушкина 8-октябрга чейин үй камагына чыгарылды. Мындан сырткары Атамбаевдин бир нече тарапкери ИИМге күбө катары сурак берүүдө. (BkA)
